غريب كيف الناس بتلونو على لون المحل اللي قاعدين فيه.... ماشالله الواحد فينا صار السحلية , وين ما تحطها بتغير لون جلدها حسب المكان الي فيه ..
بتعرفو كيف السحلية لما توقف على غصن بني بصير لونها بني؟
ولما توقف على حيط احمر بصير لونها احمر
ولما توقف على حبة قمح بصير لونها اصفر ..
هيك صاير فينا احنا .. زي السحلية , وين ما تحطنا بتغير لوننا ..
يعني الشب بقعد بمطعم هاشم وسط البلد وبعطيها نضارات ساندي بيل وطاقية بلبسها بالعكس وبلوزة قبة سبعه وبنطلون جزرة وكندرة جحا .. وبنزل بالفول والفتة بايديه و رجليه و بنادي عولد الشاي بأعلى صوت عندو بوقف من صوته عشرين سيارة مارقه ... ويا حبيبي لو كان جاي عباله كرش وفوارغ , حرب عالمية بتصير عالطاولة , و اربع رجال مابنضفو اشلاء والجثث الهامدة الي عالطاولة .. وبس يروح بوقف باص , وحتى لو في كرسي فاضي , بضلو طول الطريق عالواقف ..
و بنفس الليلة بنتقل لعبدون , بمر بياخد سيارة اخوه أو صاحبه ,بوكس شعراته , وبعطيها نضارات ريبان ,وشورت كروهات , وبلوزة سودا عليها مومياء أو جمجمة .. و بصير يلطش كم كلمة انجليزي حسب المتوفر عنده من اوكي و نو و ميبي و يو نو نووو وييييه , وبوطي صوته وبتحول لأنسان راقي وكلماته خاليه من الذم والقدح والتحقير ..
بعد بيوم بدو يطلع مع العيلة على الغور بعطيها دشداشة قصيرة , وطاقية حجاج , وبين اصابعه المسبحة .. و بركب البكب وعلى انغام صباح فخري بمشي طريقه , ولما يوصلو الغور ممنوع القعدة على الكراسي .. لازم قعدة عربية عالارض , و اعطينا يا دق طاولة و يا شطرنج , و هاتي يا مرا اساعدك بشك اللحمة وتبهير الكفة , مع العلم انه بالبيت ما بدخل المطبخ الا بالعطل والاعياد الرسمية ..
بآخر الشهر بنزل على سوق الجمعه ببنطلون رياضة و بلوزة جايبها دعاية مع سطل دهانات نشونال , وبمر بشتري شفرات حلاقة ام الاستعمال لمرة واحدة .. ولما يخلص بروح على سوق الخضرة بشتري عدة السلطة , حبتين ليمون , ضمة بقدونس , نص كيلو خيار , وكيلو بندورة ..
تاني يوم بصير اول الشهر , بعطيها لبسة سيمي فورمال وعلى شارع الوكلات بلولح بمفاتيح سيارته قدام الصبايا وبدخل على محل محل , ومن كل محل بقيس 10 قطع وبختار منهم قطعة وحدة ... بروح وهو صارف نص راتبه .. والنص التاني بخلصه وهو بكارفور او كوزمو , ومعظم مشترياته ترفيهيه من شكلاطة ام الغالية لشيبس ابو الكبير ومن هالقصص ...
ولو سألنا هالشب السحلية , كيف هيك انت مع كل موقف بتتأقلم .... وكيف بأسبوع واحد لعبت دور الشب الحفرتلي والراقي والفلاح والعتعوت والفايع والمصرفجي وابو جلدة بأسبوع واحد؟؟؟
بقلك انا شب حدق , تربيت بين الحواري والزقق , أندعكت .. .. وهاد هو الي بميز الشعب الاردني عن غيره .. ووين ما رميتنا بننزل واقفين
أهـلا وسـهـلا بـك 
